Riba dia 30 di Novèmber, 2021, nos a risibí e GRAN notisia ku Stichting Thuiszorg Banda 'Bou ta ISO 9001:2015 sertifiká!

ISO ta un norma internashonal pa garantisá kalidat haltu den un organisashon. Bou di guia di nos ‘kwaliteitsfunctionaris’ Shanela Regales-Pieternelle e proseso pa sertifikashon a kuminsá 3 aña pasá. Ku sostén di direktora Phaedra Elings, huntu ku e tim di profesionalnan di tantu departamentu di Zorg komo Transporte, Shanela a evaluá i analisá oportunidatnan i riesgonan pa ku kalidat di servisio ku Stichting Thuiszorg Banda 'Bou ta duna. 

Nan a adaptá e proseso, protokòl i instrukshon di trabou konforme reglanan stipula di kalidat pa ku ISO 9001:2015, ya asina hisa e kalidat di servisio ku Stichting Thuiszorg Banda’ Bou ta ofresé. E hefenan di departamentunan tambe a yuda vigilá i mantené e servisio profeshonal ku tur trahadónan ta duna na e klientenan di Stichting Thuiszorg Banda’ Bou.

Gerensia di Stichting Thuiszorg Banda’ Bou ta sumamente orguyoso ku huntu nos por selebrá e gran logro aki!!!

ICT Labs Caribbean
For di Òktober 2020, Stichting Thuiszorg Banda 'Bou ta traha huntu ku ICT Labs Caribbean. Huntu nan a inisiá un programa nobo i inovativo den kuido. E proyekto aki ta garantisá un método efektivo den maneho di informashon i komponentenan médiko di thuiszorg.  

​E memorandum of understanding ta trahá i firmá, dor di Stichting Alzheimer Curaçao i Stichting Thuiszorg Banda 'Bou. Riba 21 di sèptèmber, Dia Mundial di Alzheimer, nos a akudí na misa di Tera Kòrá pa un Santu Sakrifisio di misa. Despues di misa a tuma lugá e firmamentu di kolebrashon entre Stichting Thuiszorg Banda 'Bou i Stichting Alzheimer Curaçao. E dos organisashon lo traha huntu pa prevení i konsientisá komunidat tokante demensia.

Huntu nos ta logra bai dilanti!